En Mérida, fixemos varias visitas guiadas nos dous días de estancia. O día 24 comezamos cunha visita panorámica da cidade no autobús e despois iniciamos as visitas a pé, vendo o popularmente chamado Arco de Trajano, anque non ten nada que ver con este emperador, considerado como límite do cardo máximo e como porta monumental de entrada ao suposto primeiro recinto da cidade; o chamado templo de Diana, anque dedicado ao culto imperial, do século I levantado no foro e que no século XVI foi incluído no Palacio do Conde dos Cobos; polo anfiteatro, destinado a espectáculos de loitas de gladiadores que se fixo a finais do século I a. de C. inaugurándose no ano 8 a. C:: o teatro, promovido polo cónsul Marco Vipsanio Agripa, que se construíu entre os anos 16-15 a. C., abandonado no século IV d. C., e recuperado entre 1910 e 1963. Pola tarde visitamos o embalse de Proserpina e o acueduto dos Milagros.
O día 25, comezamos a xornada matinal acompañados dunha arqueóloga coa visita ao circo, onde se facían as carreiras de carros a principios dos século I, un recinto dos máis importantes de todo o Imperio Romano, despois do Circo Máximo de Roma, e o de máis capacidade de espectadores de Augusta Emérita. Rematamos a xornada da mañá coas visitas ás escavacións da basílica de Santa Eulalia e ao Museo Visigodo instalado no Convento de Santa Clara. Non puidemos visitar o museo Nacional de Arte Romano por estar pechado por remodelación.
Pola tarde fixemos á visita ás escavacións da Morería, coas murallas romana e visigoda, a alcazaba coa cisterna, a ponte romana, o columbario e a chamada Casa do Mitreo que contén o curioso mosaico cosmogónico. Mérida é un exemplo de recuperación e de posta en valor do patrimonio romano.
O día 26, de regreso, xantamos en Zamora nas Aceas de Pinilla, e despois fixemos unha visita guiada polo casco histórico, pasando polas igrexas románicas de Santa María la Nueva, Santa María Magdalena, a Praza Maior coa igrexa de San Juan de Puerta Nueva, o concello vello, a Praza de Viriato, co palacio dos condes de Alba, hoxe dedicado a parador, o Convento do Corpus Chisti, a igrexa de San pedro e San Ildefonso a Praza de Diego de Deza, a Praza da Catedral e a do Castelo. Visitamos tamén a catedral e a colección de tapices. Xa no exterior, saímos polo antes chamado Portillo de la Traición, agora da Lealdade, regresando a Lugo.
