LUGO PATRIMONIO

A asemblea xeral ordinaria da Asociación Cultural Lugo Patrimonio, na reunión celebrada o día 14 de decembro de 2019, ante a proposta feita polo conselleiro de Cultura e Turismo da Xunta de Galicia sobre o destino do Cuartel de San Fernando, acordou por unanimidade emitir o seguinte

COMUNICADO

1º. A proposta do conselleiro de facer un parador no Cuartel se San Fernando, non só vulnera a lei do patrimonio Cultural de Galicia no que atinxe aos edificios declarados BIC, senón que é desconsiderada cunha parte da cidadanía que coñece a citada lexislación, e insultante polo que de engano ten a citada proposta para os que sentimos e vivimos as cuestións relacionadas co Patrimonio Histórico - artístico.

2º. A Lei do Patrimonio Cultural de Galicia di, no tocante á utilización dos bens declarados de interese cultural (BIC) como o está o Cuartel de San Fernando, que a estes bens correspóndelles sempre unha protección integral, quedando subordinada a que non se poñan en perigo os valores que aconsellan a súa protección.

3º. Ao cuartel de San Fernando correspóndelle unha protección integral o que significa segundo a Lei, a conservación íntegra de todos os seus elementos e compoñentes nun estado o máis próximo posible ao orixinal desde a perspectiva de todos os valores culturais que conforman o interese do ben, respectando a súa evolución, transformacións e contribucións ao longo do tempo, sendo por iso punitivo concederlle licencia para convertelo nun parador.

4º. Lugo Patrimonio ratificase nas conclusións da "Xornada de Información e debate sobre a conservación e destino do Cuartel de San Fernando", celebrada o 14 de outubro de 2016, sendo estas claras no que atinxe ao destino do edificio para o Museo Arqueolóxico Galaico-romano.

5º. Este Museo, que ten que estar no recinto histórico, non é unha infraestructura caprichosa, inútil e innecesaria, senón imprescindible non só para a salvagarda, estudo e divulgación do riquísimo patrimonio arqueolóxico que temos agachado e disperso, de acordo coa Lei do Patrimonio Cultural de Galicia, senón para a economía dunha cidade terciaria que precisa a creación de producto cultural destinado ao turismo de calidade.

6º. Lugo Patrimonio lamenta a incomprensible e inaceptable actitude do conselleiro de Cultura e Turismo cunha proposta cuxa realización non está nas mans da súa consellería e a maiores innecesaria e imposible de materializar nun edificio declaro BIC, co único fin de obviar así a súa responsabilidade e competencias e tratar  de dividir á cidadanía mediante o engano para seguir demorando o incumprimento dun proxecto da súa Consellería.

Lugo, 14 de decembro de 2019.