Xoves, 05 Decembro 2019 16:49

Viaxe a Melide, Fontao (Vila de Cruces), e San Antolín de Toques

23 de novembro 2019

Dentro do ciclo dedicado ao patrimonio Industrial, e despois da conferencia de Encarna Otero Cepeda sobre “As minas de wolframio e o poboado de Fontao”, cumpría facer a visita ao Museo da Minería e ao poboado para ver a súa interesante arquitectura vinculada co Movemento Moderno.
De camiño paramos en Melide para ver ás 10,30 horas o Museo da Terra de Melide, onde, nunha visita guiada, nos explicaron a orixe do Museo así como a interesante recuperación do que foi hospital de peregrinos de Sancti Spiritus para a súa sé, mostrado en fotografía moi elocuentes do proceso. A planta baixa está dedicada á exposición de pezas de arqueoloxía pesada e a informar ao peregrino sobre as igrexas do Camiño de Santiago no concello. Na planta primeira están as vitrinas que conteñen pezas do paleolítico, mundo castrexo e romano, algunhas moi raras e interesantes, como as rodelas, así como numismática. As dúas plantas seguintes están fundamentalmente dedicadas a etnografía.


Ás 12,30 horas no auditorio de Fontao, orixinalmente dedicado a cine, o enxeñeiro de Minas Diego Casal Ramos, deunos unha charla sobre o xacemento mineiro.
Despois fixemos un percorrido polo poboado para ver o conxunto de edificios acompañados por Diego Casal. A demanda do wolframio por parte de Alemaña durante a Segunda Guerra Mundial, fixo que chegara a haber nesta zona rural máis de 10.000 persoas, unhas 3.000 traballando na mina que vivían en barracóns de madeira. Para substituílos e dotar de servizos  para as familias, construíuse o poboado entre 1955 e 1959, que foi inaugurado o 31 de xullo de 1960.
As 120 vivendas dos mineiros están situadas en bloques lineais de dúas plantas con 16 vivendas por bloque; as vivendas dos capataces da explotación, nun só edificio; as vivendas dos técnicos que é un edificio de planta baixa con dúas vivendas simétricas; o cine, situado fronte aos bloques de vivendas, con 300 butacas; as oficinas; a igrexa, na explanada, edificio baseado na arquitectura finlandesa da época, con planta trapezoidal e iluminación lateral e onde estaría o altar unha gran ventá que permite ver a fermosa paisaxe do val, a torre coa campá está é independente do edificio; as dúas escolas, a de nenos e a das nenas, con catro aulas con grandes ventás en dous edificios simétricos unidos por unha pérgola, e no centro a vivenda do mestre, exenta de dúas plantas, á que se accede mediante unha ponte.
Este interesante conxunto arquitectónico racionalista que seguindo as teorías de Wright buscan a harmonía entre a contorna natural e a estrutura da edificación,  foi proxectado nos anos 50 polos arquitectos César Cort Gómez-Tortosa, fillo do propietario da mina, e Joaquín Basilio Bas que era arquitecto da delegación de Educación en Pontevedra.
Despois trasladámonos a Toques onde xantamos, para pasas ás 17 horas a ver a igrexa prerrománica de San Antolín de Toques, acompañado do crego Evanan. Alí o presidente Adolfo de Abel Vilela e a tesoureira Julia Cantalapiedra Álvarez, os dous licenciados en Xeografía e Historia na especialidade de Arte Moderna e Contemporánea, explicaron os pormenores do edificio, orixe, elementos escultóricos de distintas épocas, que van do século X ao XII, e sobre o interesante grupo escultórico do Calvario, de tamaño natural, colocado sobre o arco triunfal, de transición do románico ao gótico, así como sobre a iconografía das pinturas renacentistas do primeiro terzo do século XVI que decoran a parede sobre o que se asentan as figuras de Cristo, a Virxe e San Xoán. Ás 18 horas fixemos o regreso a Lugo.

Enviar un comentario

Por favor, asegúrese de ter introducida a información marcada con (*). O código HTML non está permitido.

Busca nesta web

Próximos actos

  • Conferencia sobre as camelias por Carmen Salinero Corral +

    MARZO Día 6, mércores Conferencia sobre as camelias por Carmen Salinero Corral. De 19,30 a 20 h., anotacións para a Ler Máis
  • Anotacións para a viaxe do 20 de abril a Cambados +

    MARZO Día 6, mércores Conferencia sobre as camelias por Carmen Salinero Corral. De 19,30 a 20 h., anotacións para a Ler Máis
  • Viaxe para ver os pazos de Oca e Santa Cruz de Rivadulla +

    Día 16, sábado Viaxe para ver os pazos de Oca e Santa Cruz de Rivadulla. Saída ás 8,30 h. Ler Máis
  • Táboa Redonda sobre a vida e a obra de Luisa Villalta +

    Día 19, martes Táboa Redonda sobre a vida e a obra de Luisa Villalta, persoeira das Letras Galegas 2024. Interveñen Ler Máis
  • 1

O RAMO

Seccións

  • Colaboracións +

    artigos publicados por colaboradores de LugoPatrimonio Ler Máis
  • O Ramo +

    sección O Ramo da revista Na Xanela Ler Máis
  • A Pauliña +

    sección A Pauliña da revista Na Xanela Ler Máis
  • Fotolog +

    sección de fotografías Ler Máis
  • 1

ACCESO